ភ្នំពេញ៖ ក្រសួងមហាផ្ទៃបានណែនាំពីការកំណត់លក្ខណៈសម្បត្តិ និងនីតិវិធីក្នុងការវាយតម្លៃដល់មន្ត្រីនគរបាលជាតិសម្រាប់ការតែងតាំងមុខតំណែងដោយតម្រូវលក្ខខន្តចំនួន៩ ដែលរួមមាន ភាពស្មោះត្រង់ មានសីលធម៌ស្អាតស្អំ មានសុខភាពរឹងមាំ និងឆ្លងកាត់វគ្គបណ្ដុះបណ្ដាលយ៉ាងហោចណាស់ ២ខែកន្លះឡើង។

ក្នុងសេចក្ដីណែនាំចុះថ្ងៃទី១១ ខែមីនា ឆ្នាំ២០២២ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ សម្ដេចក្រឡាហោម ស ខេង បានលើកឡើងថាដើម្បីពង្រឹងការងារតែងតាំងមុខតំណែងមន្ត្រីនគរបាលជាតិឱ្យកាន់តែល្អប្រសើរថែមទៀត សំដៅបង្កើនប្រសិទ្ធភាពក្នុងកិច្ចប្រតិបត្តិការរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម រាល់ការស្នើសុំតែងតាំងមុខតំណែងដល់មន្ត្រីនគរបាលត្រូវពិនិត្យមើលលើ មនសិការស្នេហាជាតិ ស្មោះត្រង់ចំពោះ ជាតិ សាសនា ព្រះមហាក្សត្រ ជាមន្ត្រីដែលគោរពបទបញ្ជាផ្ទៃក្នុង គោលនយោបាយ និងច្បាប់រដ្ឋ ចេះផ្ដួចផ្ដើមច្នៃប្រឌិត ឧស្សាហ៍ព្យាយាម មានស្មារតីទទួលខុសត្រូវខ្ពស់។

ជាងនេះទៅទៀតពួកគេគឺជាមន្ត្រីដែលមានសីលធម៌រស់នៅស្អាតស្អំ មានសាមគ្គីភាពល្អ ជាអ្នកបម្រើ និងការពារដ៏ស្មោះត្រង់ដល់អង្គភាព និងប្រជាពលរដ្ឋ។ មានសុខភាពល្អ កាយសម្បទាមាំមួន និងបានឆ្លងកាត់វគ្គបណ្ដុះបណ្ដាលជំនាញនគរបាលជាតិយ៉ាងតិច ២ខែកន្លះឡើង។

រាល់ការតែងតាំងមុខតំណែមន្ត្រីនគរបាលជាតិត្រូវអនុវត្តដោយ មានការស្នើសុំរបស់អគ្គនាយកនៃអគ្គនាយកដ្ឋានសាមី ថ្នាក់ប្រហាក់ប្រហែល ប្រធាននាយកដ្ឋាន-អង្គភាព និងស្នងការនៃស្នងការដ្ឋាននគរបាលរាជធានី-ខេត្ត ដោយភ្ជាប់មកនូវកំណត់ហេតុប្រជុំពិភាក្សាវាយតម្លៃរបស់ថ្នាក់ដឹកនាំអង្គភាព ជាមួយប្រវត្តិរូបសង្ខេបរបស់មន្ត្រីនគរបាលជាតិ ជូនរដ្ឋមន្ត្រីមហាផ្ទៃដើម្បីពិនិត្យសម្រេច។

ក្នុងសេចក្ដីណែនាំបានបញ្ជាក់ថា៖ «រាល់សំណើសុំតែងតាំងមុខតំណែងរួមទាំងសំណុំបែបបទត្រូវឆ្លងតាមរយៈនាយកដ្ឋានបុគ្គលិកដែលជាសេនាធិការធ្វើការពិនិត្យ និងរៀបចំបែបបទតាមនីតិវិធីក្នុងការលើកយោបល់ជូនថ្នាក់ដឹកនាំតាមឋានានុក្រម ដើម្បីលើកយោបល់ជូនរដ្ឋមន្ត្រីមហាផ្ទៃពិនិត្យសម្រេច»។

ថ្លែងក្នុងពិធីបញ្ចុះបឋមសិលាសាងសង់អគារសិក្សាមួយក្នុងខេត្តបាត់ដំបងនៅថ្ងៃទី១០ ខែធ្នូ ឆ្នាំ២០២១ សម្ដេចក្រឡាហោម ស ខេង បានបញ្ជាក់ថា ការងារជាមន្ត្រីនគរបាលគឺចាំបាច់ក្នុងយល់ដឹងពីច្បាប់ និងមានសីលធម៌វិជ្ជាជីវៈជាមន្ត្រីនគរបាលត្រឹមត្រូវ។ សម្ដេចបានមានបញ្ជាឱ្យធ្វើការរៀបចំឡើងវិញនឹងបណ្ដុះបណ្ដាលដល់មន្ត្រីដែលពុំទាន់ទទួលការបណ្ដុះបណ្ដាល បន្ថែមជាមួយនឹងការធ្វើសវនាកម្មភាពមិនប្រក្រតីនៃការតម្លើងឋាន្តរស័ក្កិផងដែរ។

សម្ដេចក្រឡាហោមថា ការធ្វើកំណែទម្រង់នេះគឺក្នុងន័យតែមួយគត់គឺការធ្វើឱ្យពលរដ្ឋមានសុវត្ថិភាព មានភាពកក់ក្ដៅពីនគរបាល កែប្រែផ្នត់គំនិតរបស់ពលរដ្ឋឱ្យពេញចិត្តនិងជឿទុកចិត្តលើបេសកម្មរបស់នគរបាល៕